Yadanabom Thar
၂၀၂၅–၂၀၂၆ ပညာသင်နှစ်တွင် ဘာသာစုံ A အဆင့် ဖြင့် ထူးချွန်စွာ အောင်မြင်ခဲ့ကြသော Grade-9 နှင့် Grade-5 ကျောင်းသား၊ ကျောင်းသူ စုစုပေါင်း ၄၅ ဦး အား ဂုဏ်ပြုချီးမြှင့်သည့် အခမ်းအနားကို ဇွန်လ ၂၈ရက် နံနက် ၈ နာရီက အောင်ပန်းမြေကိုယ်ပိုင်အလယ်တန်းကျောင်း(ချမ်းအေးသာစံ) ခန်းမ၌ ခမ်းနားသိုက်မြိုက်စွာ ကျင်းပသည်။
အခမ်းအနားသို့ အောင်ပန်းမြေကိုယ်ပိုင်အလယ်တန်းကျောင်း တည်ထောင်သူ ဥက္ကဋ္ဌ ဦးရန်အောင်၊ ကျောင်းပေါင်းကျောင်းအုပ်ကြီး ဦးခင်မောင်စော၊ လုပ်ငန်းစီစစ်ရေးမှူး ဦးအောင်ဝင်း၊ ဒုတိယဥက္ကဋ္ဌ ဦးလှဝင်း၊ တာဝန်ခံ ဦးကျော်ဝင်း၊ ကျောင်းကော်မတီအဖွဲ့ဝင်များ ၊ ကျောင်းအသီးသီးမှ ကျောင်းအုပ်ကြီးများ၊ ကြီးကြပ်ရေးမှူးချုပ်နှင့်ကြီးကြပ်ရေးမှူးများ၊ ဆရာ၊ ဆရာမများ၊ ဖိတ်ကြား ထားသော ဧည့်သည်တော်များ၊ ဆုရ ကျောင်းသား၊ ကျောင်းသူများနှင့် မိဘများတက်ရောက်၍ ဂုဏ်ပြုအားပေးကြသည်။
ရှေးဦးစွာ တည်ထောင်သူ၊ ကျောင်းကော်မတီဥက္ကဋ္ဌ ဦးရန်အောင်က အဖွင့်ဂုဏ်ပြုအမှာစကား ပြောကြားပြီး ကျောင်းပေါင်းကျောင်းအုပ်ကြီး ဦးခင်မောင်စောက ဂုဏ်ပြုစကား ပြောကြားသည်။ ထို့နောက် တည်ထောင်သူ၊ ကျောင်းကော်မတီဥက္ကဋ္ဌ နှင့် တာဝန်ရှိသူများက Grade-9 ဘာသာစုံ A အဆင့်ဖြင့် ထူးချွန်စွာ အောင်မြင်ခဲ့သူ ၁၁ဦးအား ဂုဏ်ပြုဆု ကျပ်ရှစ်သိန်းစီ နှင့် Grade-5 ဘာသာစုံ A အဆင့်ဖြင့် ထူးချွန်စွာ အောင်မြင်ခဲ့သူ ၃၄ဦးအား ဂုဏ်ပြုဆု ကျပ်ခြောက်သိန်းစီ ချီးမြှင့်ပေးအပ်ကြ သည်။
အောင်ပန်းမြေကိုယ်ပိုင်အလယ်တန်းကျောင်း(ချမ်းအေးသာစံ)မှ Grade 5 တွင် ဘာသာစုံ A အဆင့်ဖြင့် အောင်မြင်ခဲ့သူ မဆုစန္ဒီဦးက ” ထူးချွန်စွာအောင်မြင်အောင် သင်ကြားပေးခဲ့တဲ့ ဆရာ၊ ဆရာများအားလုံးကို အထူးပဲ ကျေးဇူးတင်ရှိပါတယ်။ သမီးတို့ အခုလို အောင်မြင်ရတာ ဆရာ၊ ဆရာများရဲ့ သင်ကြားမှု၊ မိဘများရဲ့ ပံ့ပိုးမှုနဲ့အတူ ကျောင်းတော်ကြီးက ကျောင်းကော်မတီလူကြီးများက အစစ၊ အရာရာ ပံ့ပိုးကူညီပေးကြလို့ ဖြစ်ပါတယ်ရှင့်။ စာမေးပွဲဖြေဆိုဖို့ အစစ၊ အရာရာ ပံ့ပိုးပေးသလို အခုလို ထိုက်ထိုက်တန်တန်ဂုဏ်ပြုမှုခံရတဲ့အတွက်လည်း အတိုင်းမသိဝမ်းမြောက်ဂုဏ်ယူမိပါတယ် ရှင်” ဟု ပြောကြားသည်။
